Ons Skoollied.

Daar’s ‘n oproep tot oorwinning uit ons eie Wes-Transvaal.
In La Hoff-skool gaan ons saamwerk aan ons grootste ideal.
Ons is baie jonk maar yw’rig om ons taak hier te verrig
want die kennis bring mos vryheid –
vryheid uit die engte en die vrees, ja vrees.
Skep vir ons ‘n ruimer gees.

Agtergrond.

Dit was ook so vroeg as 1966 dat planne beraam is vir afstigting van ‘n nuwe skool uit die reeds oorvol Laerskool Saamtrek. Hierdie skool sou geleë wees in ‘n nuwe woonbuurt, La Hoff, wat op daardie stadium uit ‘n paar plotte, woonhuise en weivelde bestaan het. Twee jaar later, op 15 Januarie 1968 is hierdie wens vervul en het die skooltjie La Hoff met 226 leerlinge begin. Die eerste Waarnemende Hoof was Mnr. G.S. Schultz en die Vise-hoof was Mnr. J.G. Sassenberg; met altesaam 10 leerkragte en een sekretaresse. Die skooltjie was gevestig op ‘n oop stuk veld op die hoek van De Waal en Amandastrate. Dit het bestaan uit 10 tydelike klaskamers, ‘n kunsklas, biblioteekklas en kantore.

Mnr. J.G. Sassenberg is op 29 Junie 1968 aangestel as die eerste permanente hoof. Op 4 Julie 1970 het die skool sy amptelike naam gekry, naamlik Laerskool La Hoff. Op 9 November 1976 is daar oor die skooldrag besluit en die skoolkleure: rooi, swart en ougoud is vasgestel. Die skool se leuse is “Kennis is Vryheid.

Op 9 Augustus 1977 het die dag aangebreek en is die nuwe geboue betrek. Teen 26 Mei 1978 vind die amptelike inwyding van die skool plaas. Prof. Du Toit, destyds adjunk Direkteur van Onderwys, het tydens die geleentheid ‘n gedenkplaat onthul.

Na die skielike afsterwe van Mnr Sassenberg is Mnr. S.P. van der Lith aangestel is as die tweede permanente hoof van die skool op 1 Augustus 1987.

Met die bevordering van Mnr. S. P. van der Lith as Superintendent van Onderwys is het Mnr J.P. Badenhorst waargeneem waarna Mnr. A.F.W. Behrens aangestel is op 1 April 1997 as die derde hoof van die skool.